CEBU, Philippines - Sugod sa Septiyembre 25, wala nay politiko nga tugotan nga makadaladala og bodyguard nunot sa nagsingabot nga barangay ug Sangguniang Kabataan elections sa Oktubre 25. Ubos sa Resolution No. 9028 sa Comelec en banc ang pag-ban sa pagtakin og bodyguard mohangtod sa Nobiyembre 10, 2010. Apan ubos sa election period, ang kapolisan temporaryong dumalaon sa Comelec ug dili sa Department of Interior and Local Government. Busa, bisan ang mga polis nga close-in security sa mga politiko dili usab itugot.
Apan adunay ubang opisyal nga exempted sa maong resolusyon, kini naglangkob sa Presidente, Bise presidente, Senate President, Speaker of the House of Representatives, Chief Justice sa Supreme Court, kalihim sa Department of National Defense, kalihim sa Interior and Local Government, chairman ug mga commissioner sa Comelec, Chief of Staff sa Armed Forces of the Philippines, AFP Major Service Commanders, Director General sa PNP ug senior officers ug mga sakop sa foreign diplomatic corps.
Samtang gipadayag ni Comelec acting regional director Veronico Petalcorin nga mahimong mo-aplay og exemption base sa balido nga rason, ilabi na kun dunay hulga sa kinabuhi. Patubagon sa Comelec ang mga polis nga magmagahi og ulo ug mamugos sa pag-bodyguard sa politiko.
Samtang sugdan usab sa Comelec-7 ang estriktong pagpatuman sa Comelec gun ban. Lakip sa sakmiton sa kapolisan panahon sa gun ban mao ang mga airsoft rifle. (BANAT NEWS)