Garcia di mabasol sa mga kawani

CEBU, Philippines - Si Gov.Gwen Garcia miingon kagahapon nga dili siya ang angayang basolon sa mga kawani sa Kapitolyo sa kalangay sa pagdawat sa ilang mga benepisyo karong tuiga sanglit dugay na niyang   gipapasar ang supplemental budget sa hunta probinsiyal.

Matud pa ni Garcia nga ang hinungdan sa pagkatanggong sa P114 milyones nga supplemental budget mao si Bise Gobernador Gregorio Sanchez, nga maoy naglangay-langay sa pagpirma sa maong supplemental budget bisan og giaprobahan na kini sa mga sakop sa hunta probinsiyal.

Si Garcia nagkanayon nga iyang gipadali ang pagpapasar sa maong budget pinaagi sa pag-isyu og certificate of urgency hinungdan nga naaprobahan dayon sa 1st, 2nd ug 3rd reading niadtong nakalabay’ng semana.

Apan hangtud karon anaa pa gihapon kini sa lamesa sa bise gobernador ug wala pa gyud kini pirmahe. (BANATNEWS)