CEBU, Philippines - Usa ka sakop sa grupong Bloods gipusil patay sa usa ka miyembro sa grupo nga Crips sa eskina sa mga dalan Gabuya ug Dacalos, sa barangay Poblacion, Pardo ning dakbayan sa Sugbo sa miaging gabii.
Ang biktima mao si Raymart Tabura Limbaga, 17, sakop sa Bloods, nga taga dalan J. Tabura sa barangay Pardo, samtang ang suspetsado mao usab si Romel Garces Uabana, 23, ulitawo nga sakop sa Crips.
Sumala sa kapolisan nga naglakaw ang biktima sa eskina Gabuya ug Dacalos uban sa iyang barkada dihang giatangan kini sa suspetsado nga kauban usab sa iyang mga barkada.
Gumikan sa daan nang panagdumot, gibirahan dayon sa suspetsado pagpusil ang biktima ug nasabak kini sa kilid ug tiyan nga maoy hinungdan sa iyang kamatayon.
Nagtingkagol na karon sa prisohan ang suspetsado human kini masikop sa kapolisan. (BANATNEWS)