CEBU, Philippines - Usa ang patay samtang usa usab ang angol sa pagpamusil nga nahitabo didto sa dalan Mabini, barangay Poblacion, dakbayan sa Danao sa miaging gabii.
Ang nakabsan sa kinabuhi mao si Ric Arthur Barriga Tabla, 31, nga taga barangay Cogon, samtang ang naangol mao usab si Joseph Ypil, 43, nga taga sitio Aroma , barangay Suba pulos sa maong dakbayan.
Ang suspetsadong mipatay kang Tabla nailhan usab nga si Paul Enriquez Gorre, 42, nga taga barangay Guinacot sa mao gihapong dakbayan, samtang ang mipusil angol kang Ypil nailhan usab nga si Wilmer Priscillas, 43, nga silingan ra usab ni Ypil.
Sumala sa kapolisan si Tabla may gikalalis nga wala hilhing tawo dihang miabot ang suspetsado ug misalmot sa maong lalis.
Dihang nakabsan na sa katarungan ang suspetsado milanit kini sa iyang armas ug dihadiha giluthang ang biktima kinsa nasabak sa ilok nga maoy iyang namatyan.
Samtang si Ypil mibutyag nga didto ra siya sulod sa ilang balay dihang giluthang siya sa suspetsado nga si Priscillas sa walay igong hinungdan.
Apan ang kapolisan natahap nga may karaang panagdumot ang biktima ug ang suspetsado nga malagmit maoy hinungdan sa maong pagpamusil
Si Gorre mitahan nga malinawon sa iyang kaugalingon ngadto sa kapolisan ug nagtingkagol na karon sa prisohan, samtang si Priscillas gipangita pa karon sa kapolisan.(Uban sa report ni Lesley Caminade) (BANATNEWS)