CEBU, Philippines - Gibutyag sa kanhi bodyguard sa anak ni Talisay City Mayor Socrates Fernandez nga si Joavan nga gihimo nilang suyopanan ang kapilyang ampuanan sa mayor diha sa Vista Grande Subdivision sa barangay Bulacao sa dakbayan sa Talisay.
Sa report sa TV Patrol Central Visayas, si Guillermina Barrido mibutyag nga usa siya sa siyam ka mga bata-bata ni Joavan nga magsuyupan diha sa maong kapilya.
Matud pa niini sa maong report nga tagsa ka bulto ang ilang mahurot nga shabu sa matag adlaw ug diha nila kini suyupon sa maong kapilya.
Ang mga tigbalita dihang misuway og adto sa maong dapit wala tuguti sa mga gwardiya nga makasulod apan gikatahong mikumpirmar ang gwardiya nga mag-anhaan matag adlaw si Joavan ug mga barkada niini.
Si Barrido maoy nasentro karon sa atensyon sa kapolisan human kini unang mipabuhagay kabahin sa giingong kalambigitan ni Joavan sa pagpayuhot og ilegal nga drugas sa maong dakbayan.
Hinuon kusganong gihimakak kini sa kampo ni Fernandez. Si Barrido kasamtangang gikustodiya sa kapolisan. Siya usab maoy mibutyag nga adunay kakunsabong ahente sa Philippine Drug Enforcement Agency ang anak sa mayor sa ilegal nga drugas, butang nga gihimakak sa maong ahensya. (BANATNEWS)