Kaso ni Reluya gibasura sa Ombudsman

CEBU, Philippines - Gibasura sa Ombudsman Visayas ang kasong gipasaka batok sa kanhi mayor sa lungsod sa San Fernando nga si Lakambini Reluya ug sa municipal treasurer nga si Lorna Manugas sa giingong anumalusong pagpagawas nila og pundo alang sa dengue control outbreak.

“Whereof, premises considered, this criminal complaint against Lakambini Reluya, municipal mayor, and Lorna Manugas, municipal treasurer, is hereby dismissed”, kini tipik sa napulo ka pahinang resolusyon sa desisyon sa graft investigation ug prosecution officer II nga si Portia Pacquiao-Suson.

Matud ni Suson nga ang gibuhat ni Reluya alang sa kaayohan tungod sa paghatag niini og pagtagad sa nahisgutang problema sa dengue.

 Base sa records sa Department of Health Regional Epidemiology and Surveillance Units niadtong Agosto 28, 2007 sulod sa 33 ka semana mikabat ngadto sa 95 ang natalang kaso sa dengue sa lungsod sa San Fernando diin dunay nangamatay.

Laing tipik sa resolusyon si Suson nagkanayon kini nga “this is of the essence with calamities, and this is obviously the reason why the NDCC (National Disaster Coordinating Council) Memorandum allows the drawing of cash advances by the local chief executive body”.

Ang nahisgutang reklamo naaprobahan ni Pelagio Apostol ug Mark Jalandoni, Ombudsman for Luzon ug naresolba niadtong Hulyo 16, 2009 apan niining bag-o lang na-release.

Ang mga konsehal sa lungsod sa San Fernando nga sila si Vidala Loguiber, Alexander Alicaway, Eutiquio Baricuatro, Felipe Parino, Remegio Alicaway, Miguel Canoy, Juvy Procianos ug Niel Enriquez maoy miduso sa nahisgutang reklamo ngadto sa buhatan ni Apostol, Deputy Ombudsman niadtong Septiyembre 4, 2007 batok kang Reluya tungod sa pagpagawas sa kanhi mayor og P400,000 nga pundo gikan sa calamity funds.

Ang maong salapi gigamit ni Reluya sa dengue outbreak sa barangay Pitalo diin niadtong higayona mikabat ngadto sa 95 ka kaso sa dengue ang nahitabo diha sa maong barangay ug tulo niini ang namatay.

Ang nahisgutang mga konsehal mikwestiyon sa pagpagawas ni Reluya sa calamity fund tungod kay wala silay pagtugot niini.

Apan si Reluya sa iyang tubag sa reklamo nagkanayon kini nga mihangyo siya sa konseho nga moaprobar og resolusyon nga magtugot kaniya sa pagpagawas og pundo ubos sa calamity funds human siya makadawat og komunikasyon gikan sa Department of Health (DOH)-7 kabahin sa dengue outbreak diha sa ubang barangay sa lungsod.

Apan ang konseho giingong miawhag kang Reluya nga mogama una og program of works sa pagsiguro nga dili mausik ang pundo tungod kay usa kini sa ilang mga rekisitos una siya tugotan nga makagamit sa pundo sa calamity fund.  (BANATNEWS)