CEBU, Philippines - Kritikal ang usa ka konduktor human gi-ulo pagpusil sa wala pa mailhing lalaki pasado ala-una sa miaging hapon sa National Highway sa barangay Lipata lungsod sa Minglanilla.
Ang biktima nailhan nga si Booby Ricaplaza Pordauza, 34 ug molupyo sa barangay Tangil lungsod sa Dumanjug ug usa kini ka konduktor sa Chan Transit Bus. Sa pakighinabi sa Banat News ni SPO2 Reberto Canencia mibutyag kini nga samtang nagdagan ang gikondukan sa biktima nga pasaheoang bus kalit lang nga mitumaw ang panaglalis niini tali sa usa ka wala pa mailhing pasahero.
Tungod niini daw nagka-init na ang ilang panaglalis kalit lang nga mibunot og armas ang wala mailhing lalaki ug mideretso og pusil ngadto sa biktima.
Ang biktima nga nakaangkon og samad pinusilan sa iyang ulo daling gidala sa Vicente Sotto Memorial Medical Center. Samtang ang suspetsado dali usab nga nakasibat human sa panghitabo. Matod pa ni Canencia nga wala pa sila masayod kun si kinsa ang maong lalaki kini tungod kay bisan sa ilang gipangutana nga kauban nga mga pasahero wala sila makabantay kini tungod kay kalit kaayo ang panghitabo ug misutoy usab dayun og sibat ang suspetsado. Mihulagway si Canencia nga posibling kaila ra kadto sa biktima ug aduna kini kanhi panagbangi ug posibling kato pang higayona sila nagkakita og balik ug nagkahisgutay sa ilang mga away. Apan matod pa ni Canencia nga ang ilang kapolisan mipahigayon og imbestigasyon ug kun si kinsa ang maong lalaki nga namusil ug kasamtangan kini nila karun nga gipangita. (BANATNEWS)