Duha biktima sa pagpanunggab

CEBU, Philippines - Samaran ang usa ka lalaki human dunggaba sa iyang kapuyo nga babaye sa Purok 1, barangay San Jose ning siyudad kagahapon sa kadlawon.

Ang biktima giila sa mga polis nga si Charlon Calamba Paring, 36-anyos, usa ka housekeeping personnel sa Samsung Multi English ug molupyo sa maong dapit.

Ang suspetsado mao si Elizabeth Sentienta Cuyos , 26, lumad nga taga Palompon Leyte.

Base sa imbestigasyon sa kapolisan nga ang suspetsado ug biktima nagkaaway ug milakaw ang suspetsado gikan sa ilang balay nga gipuy-an apan mibalik kini tungod kay dunay nakalimtan nga butang.

Apan misamot ang panag-away sa duha dihang mibalik si Cuyos ug sa kalagot sa suspetsado giluba niini si Paring.

Human sa maong hitabo daling mibiya si Cuyos gikan sa balay.

Si Paring nakaangkon og samad dinunggaban sa tuong bukton dali kining gidala ngadto sa North General Hospital.

Sa laing bahin, nagtingkagol sa detention cell sa San Nicolas Police Station ang usa ka tireman human kini namato ug nanunggab sa iyang silingan sa miaging adlaw diha sulod sa sam-ang sa barangay Calamba, dakbayan sa Sugbo.

Ang biktima mao si Ireneo Regudo Villanueva, 68-anyos molupyo sa maong dapit kinsa nakaangkon og samad dinunggaban sa ubos sa tuong bahin sa iyang tiyan, walang bukton ug uban pang parti sa lawas daling gidala ngadto sa Cebu City Medical Center (CCMC).

Ang suspetsado mao si Atillano Andong, silingan sa biktima ug usa ka tireman sa usa ka vulcanizing shop sa maong dapit.

Gikataho nga sa wala pa mahitabo ang insidente ang biktima natulog diha sulod sa iyang balay apan gipukaw kini sa iyang anak lalaki nga si Glen tungod kay gibato sa ilang silingan ang ilang balay.

Gigawas sa biktima ang suspetsado nga namato aron unta makig-istorya ug mangutana sa hinungdan sa pagpamato niini.

Apan paggawas ni Villanueva sa ilang balay gideretso siya og atake ni Andong ug giluba.

Si Andong nasikop sa mga barangay tanod nga miresponde ug gitugyan kini ngadto sa mga polis. (BANATNEWS)