Dasmag 6 anyos patay

CEBU, Philippines - Namatay ang usa ka 6 anyos nga bata   human madasmagi sa usa ka van didto sa national highway sa sitio Tinibgan, barangay Panalipan, lungsod sa Catmon.

Ang biktima mao si RJ Quimat, 6, estudyante sa Grade 1 sa Panalipan Elementary School sa maong lungsod, samtang ang drayber sa van nga nakadasmag nailhan usab nga si Agustin Batoon Aresco, nga taga Basak, dakbayan sa Mandaue.

Si SPO2 Rex Menchavez sa Catmon Police Station mibutyag sa Banat News nga ang suspetsado nagmaneho sa Mitsubishi van nga may plakang CRW-495 paatubang sa amihanan.

Apan sa pag-abot sa maong sakyanan sa nahisgutang lugar, kalit lang milabang ang biktima ug gumikan sa kakalit, wala na makakontrolar ang suspetsado sa dagan sa sakyanan ug nadasmagan gyud ang bata,

Gihatod dayon ang biktima ngadto sa Danao City District Hospital apan gibalhin kini sa Cebu Doctor’s Hospital sa dakbayan sa Sugbo diin didto usab kini kabugtoi sa iyang kinabuhi. (BANATNEWS)