Bigtime pusher tiklo

CEBU, Philippines - Nasikop sa kapolisan sa Lapulapu ang usa ka big time drug pusher atol sa buybust operation didto sa Sitio Humayhumay, Barangay Gun-ob, dakbayan sa Lapulapu sa miaging gabii.

 Ang nasikop mao si Rolly Lumabas, 38, minyo , nga taga Gun-ob kinsa usa ka notado nga big time drug pusher sa listahan sa kapolisan.

 Matud pa ni Police Insp. Glenn Hife sa City Anti Illegal Drug Special Operation Task Force o CAIDSOTF sa kapolisan sa Lapulapu, nga dugay na nilang gipanid-an si Lumabas sa iyang illegal nga pagpamaligya og drugas sa maong dapit diin gitumbok nga siya usab ang tinubdan sa shabu sa pipila ka mga pusher.

 Gumikan niini usa ka buy bust operation ang gihimo sa CAIDSOTF sa milabay’ng gabii sa maong dapit.

 Atol sa maong buy bust operation, usa ka decoy sa kapolisan maoy mihatag sa ilang buy bust money ug sa pagtunol usab ni Lumabas sa usa ka gamay’ng plastic sa gituhoang shabu, giposasan dayon siya sa mga operatiba.

 Dihang gihiling nila ang lawas ni Lumabas, nasakmit gikan kaniya ang 4 ka medium pack sa gituohang shabu, 50 ka gagmay’ng pakete niini, ug kalibre 45 nga pistola nga may pito ka mga buhing bala sulod sa magazine.

 Gawas sa shabu, nakuha usab sa kapolisan gikan sa suspetsado ang usa ka medium nga pakete sa gituhoang cocaine.

 Ang maong mga ebidensiya pormal nga gihandos ngadto sa PNP crime laboratory aron himoong ebidensiya sa pagpasaka og kaso batok ni Lumabas.

 Kasamtangang gibalhug sa Lapulapu police detention cell si Lumabas samtang kasong kalapasan sa Sec. 5 ug Sec. 11 Art. II sa Akta Republika 9165 ang gipasaka batok kaniya. (BANATNEWS)