Kaalyado ni Joavan gipatawag ni Biñas

CEBU, Philippines - Ang babayeng giingong kanhi kaalyado ni Joavan Fernandez giimbitar ni Superintendent Henry Biñas , hepe sa kapolisan sa Talisay ug gipakita kaniya ang mga policewoman sa Talisay City Police Office (TCPO) niadtong Biyernes sa gabii ug kagahapon sa buntag.

Si Guillermina Barrido, 34, nga nahinabi sa Banat News kagahapon mibutyag nga niadtong Agosto 20, 2010 nahinabi niya si Joavan sa usa ka parking area sa dakung tindahan sa barangay Tabunok, Talisay uban sa iyang mga bata-bata ug usa ka babaye.

Ang nahisgutang babaye gipaila ni Joavan ngadto kang Barrido nga usa ka policewoman nga nadestino sa TCPS nga maoy iyang back-up.

Ang TCPS adunay lima ka mga policewoman nga ubos sa Field Training Program (FTP) ug tulo ka organic.

Apan kagahapon si Barrido nagkanayon sa Banat News nga wala sa walo ka policewoman kadtong babaye nga gipaila ni Joavan kaniya.

Gibutyag usab ni Barrido nga gawas sa nahisgutang policewoman aduna pa siya’ y nakaila nga usa ka sakop sa Philippine Drug Enforcement Agency (PDEA) nga giingong kaalyado usab ni Joavan.

Matud ni Barrido nga dili siya makalimot sa hitsura sa giingong sakop sa PDEA ug policewoman kung iyaha kining makita.

Kahinumdoman nga sa milabay’ng adlaw si Joavan mihimakak nga aduna siya’y mga kaalyadong polis sa TCPS ug labaw na nga wala siya’y kaila nga sakop sa PDEA tungod kay aduna gani siya’y giatubang nga mga kaso karon kabahin sa ginadiling drugas.

Si Barrido mipasangil usab nga ang mga bata-bata ni Joavan padayong nangita kaniya ug gani ang iyang duha ka anak naundang na sa pag-iskwela tungod sa sitwasyon.

Gibutyag niya nga nagsugod ang kasuko ni Joavan ngadto kaniya dihang nananghid siyang mobiya na sa poder niini ug mangita og laing trabaho.

Matud usab niya nga sulod sa upat ka buwan silang nagpuyo sa balay nga paabangan sa amahang mayor ni Joavan diha sa 9th Street Mansueto Subdivision, barangay Bulacao, Talisay.

Dihang mibalhin sila sa maong balay gikuha siya ni Joavan isip personal nga body guard ug gisaaran nga sweldohan apan hangtud nga migawas siya, wala siya makadawat og sweldo.

Giingong sila si Barrido wala usab mobayad sa abangan sa balay nga P2,500 matag buwan. (BANATNEWS)