Sugal sa kaka 1 patay

CEBU, Philippines - Usa ang patay ug usa usab ang naangol dihang gipamusil sila sa usa ka hubog kinsa nasuko nga napildi og P20 sa sugal nga pagpa-away og kaka didto sa Sitio Casantos, barangay Cabadiangan lungsod sa Liloan niadtong Biyernes sa alas 8:50 sa gabii.

Ang namatay dihadiha mao si Arnel Bataluna Barreta, 26, ulitawo, samtang ang na-angol mao si Jonas Bughao, hingkod ug pulos taga Liloan.

Samtang ang suspek mao si Jimmy Lucedo, 27 , ulitawo, nga silingan ra usab sa mga biktima.

Si SPO4 Terso Lima sa Liloan Police Station mibutyag sa Banat News nga ang mga biktima kauban sa laing mga estambay nalingaw sa pagtan-aw sa pustahanay sa pagpa-away sa kaka sa usa ka bilyaran sa maong lugar.

Subay sa inisyal nga imbistigasyon sa kapolisan, nasayran nga kalit lang miabot ang suspek nga hubog niadtong tungora dayon miposta og P20 dapig sa kaka sa usa ka Rolando Gomez.

Apan dihang gipaaway na ang mga kaka, napildi ang kaka ni Gomez hinungdan nga mihiwasa sa kasuko ang suspek ug gi-away niini si Gomez tungod kay matud pa banga ang iyang kaka ug nagbagulbol nga mipauli sa ilang balay.

Apan wala magdugay nahibalik ang suspek nga armado na sa wala matinong kalibre sa armas de fuego ug sa walay daghang estorya gipusil si Barreta sa walang bahin sa ulo hinungdang nahagba kini sa yuta .

Human matumba si Barreta, gipamusil pa usab sa suspek ang ubang mga estambay ug naigo na usab sa walang bukton si Bughao.

Si Barreta daling gihatod ngadto sa Eversely Sanitarium Hospital sa dakbayan sa Mandaue, diin siya makabsi sa kinabuhi human sa pipila ka takna.

Samtang si Bughao didto usab ihatod sa Vicente Sotto Memorial Medical Center sa dakbayan sa Sugbo.

Human makaigo sa duha ka tawo, dali nga misibat ang suspetsado ug mibiya sa maong dapit.

Sa pagsulat ning balita padayon pang gipangita sa kapolisan ang suspetsado.(Uban sa report Lesley Caminade) (BANATNEWS)