Mangunguot nga babaye tiklo

CEBU, Philippines - Gibutyag sa kapolisan sa dakbayan sa Mandaue nga alerto na sila karon gumikan sa pagdagsang na sa mga mangunguot dinhi nga ania sa Sugbo tungod sa nagsingabot na ang Pasko.

Usa sa mga nasikop sa kapolisan sa Mandaue nga suspetsadong mangunguot mao si Charity Acosta, 36, lumad nga taga Davao City apan kasamtangang nagpuyo sa likod sa Eversley Sanitarium, sa barangay Jagobiao, sa dakbayan sa Mandaue.

Si SPO2 Jeffery Diola sa Mandaue City Police Office mibutyag nga si Acosta kinsa nadakpan nila didto sa SM mall, makatulo na ka higayon nila kining nadakpan.

Si Acosta nga giingon sa kapolisan nga daghan usab og kaubang mangunguot, nasikop sa kapolisan dihang misumbong kanila ang mga security guard sa SM kalabot sa kadudahang lihok sa maong suspetsado. - BANAT NEWS