CEBU, Philippines - Samdan ang usa ka ulitawo human kini dunggaba sa usa ka drayber sa traysikad didto sa barangay Simala, lungsod sa Sibonga sa miaging adlaw.
Ang biktima nailhan nga si Rey William Caminade, 26, ulitawo, nga taga barangay Simala, samtang ang suspetsado nailhan usab nga si Junither Panerio, 22, silingan sa biktima.
Sumala sa imbistigasyon sa kapolisan, ilang nasayran nga daan nang nagkabangi ang biktima ug ang suspetsado, hinungdan nga dihang nagkita sila gibukobuko pagluba sa suspetsado ang biktima.
Gihatod dayon ang biktima ngadto sa Carcar District Hospital samtang ang suspetsado gipangita pa usab karon sa kapolisan human kini mosibat. – BANAT NEWS