P2M gamiton sa laing proyekto

CEBU, Philippines - Mga residente sa sitio Kalubihan, barangay Kalunasan dakbayan sa Sugbo ug ang ilang kapitan nga si Edelito Mabano ang nag-dayalogo sa milabay’ng gabii.

Kini dunay kalambigitan sa pagbutang unta og sementong koral diha sa Kalubihan Sports Complex apan ang maong plano wala madayon tungod sa posibilidad nga maglisod na sa pag-agi ang mga residente nga nagpuyo diha sa duol sa Sports Complex.

Ang budget nga sobra sa duha ka milyon nga alang unta sa maong proyekto gi-divert ngadto sa laing proyekto.

Matud ni Mabano nga giuyonan sa iyang mga konsehal ang maong desisyon.

Apan duha sa iyang mga konsehal ang mingreklamo nga unta apil man kini nga mipirma sa resulosyon sa pag-divert sa proyekto.

Nagkanayon hinuon ang kapitan nga paninduton ang sawog sa maong sports complex.

Dugang pa niya nga usa sa pagsige og panaway kaniya mao ang iyang first councilor nga si Nunilon Monares nga moatbang kaniya sa umaabot nga eleksiyon karung Oktubre. 

Atol sa gihimong pulong-pulong ni Mabano sa sitio Kalubihan, usa ka supporter ni Monares ang nagsige og balik-balik sa iyang pangutana   bisan gitubag na kini sa kapitan.

Samtang usa ka empleyado sa barangay ang mitaho dinhi Banat News nga matud pa dunay gihimo nga suwat ang pipila ka residente sa maong sitio nga naningil sa ilang proyekto.

Apan nasayran nga   pipila niini ang nahibulong kay matud pa nga nalakip ang ilang pangalan sa maong listahan nga wala sa ilang kasayoran busa gidudahan nga hinimo kini sa ilang kaatbang. - BANAT NEWS