CEBU, Philippines - Duha ang patay, usa niini 10-anyos nga batang babaye, ug laing siyam ang nangaangol kadaghanan mga minor de edad sa dihang ang usa ka 10-wheeler truck naputlan og preno ug midaro ngadto kanila kagahapon sa alas 12:05 sa hapon sa barangay Don Andres Soriano Uno, siyudad sa Toledo.
Human sa maong disgrasya sa Toledo, gitubag kini og aksidente sa South Road Properties (SRP) sa dihang nalimbuwad ang usa ka mini-dumptruck (YHT-242) nga puno og balas gikan sa Talisay paingon sa dakbayan sa Sugbo. Ang trak gimaneho ni Jonathan Anibor ug adunay unom ka hitch-hiker nga sama sa drayber naangol ug gidala sa ospital. Ang drayber giingong nakatulog.
Sa Toledo, patay diha-diha si Maria Teresa Tatoy, 10, taga DAS Llafo, dakbayan sa Toledo ug alas 4 sa hapon, namatay usab ang laing biktima nga si Cerelo Labastida, drayber sa multicab (YCN-233) diha sa South General Hospital sa lungsod sa Naga.
Ang mga naangol mao sila si Arthly Clair Wagas,12, Enrique Repunte, 11, Treshea Villareno,11, John Michael Tatoy, 6, manghud ni Maria Teresa, Jerome Montebon, 50, tanod, Jose Samdy Perez, 64, Maria Angelica Macapobre, 20, Glory Pardillo, 15 ug Charles Jay Setsad, 8.
Ang drayber sa nahisgutang trak nga si Richard Villarmea, 30, taga sitio Anislag, barangay Canlumampao, Toledo nadetiner karon sa Toledo City Police Station ug mag-atubang og kasong reckless imprudence resulting to homicide, multiple physical injury ug damage to property.
Sa imbestigasyon ni SPO1 Anacleto Young sa Toledo City Traffic Division nasayran nga ang trak dunay karga nga makina sa sakyanan gikan sa barangay Poblacion, Toledo paingon sa ilang buhatan sa RGY Sand and Gravel sa Naga.
Niadtong higayona si Villarmea dunay uban nga mekaniko nga si Juvenal Marter, taga Danao.
Base sa imbestigasyon sa kapolisan nga pag-abot diha sa tangason nga karsada diin mahitabo ang insidente mipahunat og padagan si Villarmea apan giingon naputlan sa preno ang trak hinungdan nga mibangga kini sa motorsiklo (6656-GP) daplin sa karsada. Ang drayber sa motorsiklo nga wala pa mailhi naghatod sa iyang duha ka mga anak sa Don Andress Soriano Elementary School.
Human mibangga ngadto sa motorsiklo, ang trak midaro ngadto sa multicab ni Labastida dayon milahos ngadto sa tunga sa karsada ug miigo sa tanod nga nagpalabang sa tulo ka mga bata ug usa sa maong mga bata mao si Maria Teresa.
Ang duha ka bata nga milabang natukmod sa tanod sa dihang nakita niini ang trak nga mipaingon kanila.
Si Maria Teresa wala mobuhi sa tanod hinungdan nga naligsan usab kini. – BANAT NEWS