City hall gipaningil sa PLDT

CEBU, Philippines - Gipaningil na sa tagdumala sa Philippine Long Distance Company (PLDT) ang kagamhanan sa dakbayan sa Sugbo sa utang niining mokapin sa P2 milyones.

Matud pa ni Diowen Mancera, corporate revenue analyst sa PLDT nga ang nabayran sa City Hall sa bayranan niini sa telepono sa buwan sa Hulyo, P426,77.20 ra ug may kuwang pa kini nga P2,034,258.18.

Gumikan niini gipadalhan ni Mancera og suwat si konsehal Jose Daluz, ang chairman sa committee on budget and finance.

Hinuon sa bahin ni City Treasurer Ofelia Oliva, kini mibutyag nga wala pa niya madawat ang demand letter sa PLDT.

Nahibulong siya nganong si Daluz may gipadad-an sa suwat nga unta siya may treasurera.

Gawas pa niini daghang mga linya sa telepono sa City Hall nga wala na motingog, unya nganong dako man kaayo ang ilang bayranan.

Busa mihangyo si Oliva kang Mayor Michael Rama nga ipasusi kini sa usa ka special team. – BANAT NEWS