Wanted di magpapriso sa Naga

CEBU, Philippines - Usa ka kriminal nga dugay nang gipangita sa kapolisan sa dakbayan sa Naga nga nadakpan didto sa dakbayan sa Lapulapu sa miaging adlaw nahadlok magpapriso didto sa Naga.

Matud pa ni Ivan Manabat, kinsa molupyo sa sitio Lasang, barangay Mactan, sa Lapulapu nga dili siya makasiguro sa iyang seguridad didto sa prisohan sa Naga.

Si Manabat didto   hidakpi sa ilang balay pinaagi sa kapolisan sa Lapulapu nga nagdala og usa ka alias warrant of arrest nga giluwatan ni Judge Bienvenido Saniel Jr. sa RTC Branch 20 niadtong Hulyo 24, 2009 sa kasong murder.

Matud pa ni SPO1 Rodito Viovicente sa Police Community Relations sa kapolisan sa Lapulapu nga nasikop si Manabat human moreport ang iyang mga silingan ngadto kanila bahin sa pagka-wanted niini didto sa dakbayan sa Naga.

Busa gikonpirmar dayon sa kapolisan sa Lapulapu ang kapolisan sa Naga una nila sikopa si Manabat.

Gani gipasidan-an pa sila sa kapolisan sa Naga nga angay silang magbantay kay armado si Manabat og Uzi ug .45 kalibreng pistola.

Ang nangulo sa team sa kapolisan sa Lapulapu nga misunggaw kang Manabat sa ilang balay mao si SPO3 Mario Poblete ang deputy chief sa Tourist Police sa Lapulapu.

Nasuta ni Viovicente nga si Manabat usa ka hitman sa Tau Gamma ug giingong nakapatay na kini og duha ka tawo sa Naga.

Unya matud pa ni Viovicente nga nakapatay pa usab og usa ka babaye si Manabat didto gihapon sa Naga.

Sayo niini si Mayor Paz Radaza sa Lapulapu mimando sa iyang konstituwente nga ipareport sa kapolisan kun may silingan sila nga gun for hire.

Busa ang mga silingan ni Manabat kinsa nasayod nga usa kini ka hired kriminal nga adto mangihaw og tawo sa Naga , apan adto motago sa Mactan, ila dayon kining gireport sa kapolisan sa dakbayan sa Lapulapu.

Nadakpan usab si Manabat sa kapolisan sa dakbayan sa Sugbo atol sa checkpoint diin nasakmitan kini og armas de fuego.

Nagpaila kuno kining Arnold Santiago busa wala mabalhog og dugay sa prisohan kay nakapiyansa og P70 mil.

Kagahapon may commitment order na alang kang Manabat nga adto ibalhog sa Cebu Provincial Detention and Rehabilitation Center.  – BANAT NEWS