CEBU, Philippines - Ang drayber nga nagmaneho sa Toyota Revo nga gipanag-iya sa kagamhanan sa Talisay akusado usab sa kasong two counts of serious illegal detention, matud ni Talisay City Prosecutor Marcial Rubia.
Matud ni Rubia nga si Benedict Gabasa usa sa mga kauban ni Joavan Fernandez, sinagop ni Mayor Socrates Fernandez nga gipasakaan og kasong duha ka kasong serious illegal detention sa amahan ug anak nga Oscar ug Osbert Abellana.
Kahinumduman nga si Joavan dunay mga kauban niadtong tuig 2008 nga giingong midagit kang Osbert ug sa ig-agaw niining si Winston Abella sa dihang ang ligid sa service vehicle sa mayor nga gipatapakan sa vulcanizing shop sa iyaan sa duha nga si Mercidita Abellana, giingong gikawat.
Ang mag-agaw’ng Abellana mipasangil nga gidala sila ni Joavan sa balay niini sa Mansueto Subdivision sa barangay Bulacao, Talisay diin sila gikulata ni Joavan ug sa mga kauban niini.
Matud ni Rubia nga ang maong kaso walay piyansa nga girekomendar apan ang korte nakakita og buslot hinungdan nga si Joavan ug ang iyang mga kauban nakapiyansa.
Ang nahisgutang kaso padayon pa hangtod karon ug ang amahan ug anak nga Oscar ug Osbert ubos pa usab sa witness protection program.
Si Gabasa maoy nagmaneho sa Toyota Revo (SGH-541) nga nababagan sa mga polis sa Pardo Police Station sa milabay’ng adlaw sa barangay Bulacao human gi-alarma si Joavan ug laing tulo ka lalaki nga nanion sa Mango Square ug gituohang sakay sa maong sakyanan.
Si Arturo Bas, public information officer sa Talisay mibutyag sa milabay’ng adlaw nga si Gabasa nalakip sa mga job order sa siyudad ubos sa quota ni Mayor Fernandez ug nadestino sa feeding program. – BANAT NEWS