Nasakmita'g marijuana tanggong

CEBU, Philippines - Nagtingkagol karon sa karsel ang usa ka batan-on human masikop nga naghupot og 11 ka pakete sa gituohang dahon sa marijuana atol sa ronda nga gihimo sa kapolisan didto sa barangay Magdugo, dakbayan sa Toledo sa miaging gabii.

Ang nasikop nailhan nga si Sonny Omayan, 22, nga taga Magdugo kinsa nasakmitan og 11 ka kilo nga gituohang dahon sa marijuana.

Sa pakighinabi sa Banat News ni PO2 Roxam Enerio sa Toledo City Police Station , siya mibutyag nga nagpatrolya sila si PO3 Rey Bucato ug PO3 Chris Gaco sa maong lugar sa maong higayon dihang ilang nakit-an nga adunay nagtapok nga mga tawo sa daplin sa karsada kay naghantak.

Didto hisakpi sa kapolisan ang suspetsado kansang motorsiklo giparking   duol sa gihantakan ug dihang gisita kini bahin sa mga papeles sa iyang sakyanan, miabli siya sa iyang tool box aron pagkuha sa maong mga papeles dihang maoy nakit-an sa kapolisan sa maong tool box ang usa ka plastic canister nga gisudlan sa 11 ka paketeng gituohang marijuana.

Ilabay na unta sa suspetsado ang maong mga butang dihang gipugngan siya sa kapolisan busa gisikop dayon nila kini dihadiha ug gibalhog sa prisohan. - Lesley Caminade ug Brenda Batuto (BANAT NEWS)