Inahan napasok sa trak de karga

CEBU, Philippines - Patay ang inahan ug nalaksi ang tiil sa anak human napasok sa trak de karga ang gisakyan nilang motorsiklo sa dihang nawad-an og preno sa dihang nakaligis og iro ug didto mopaingon sa gikasugat nga trak de karga sa national highway sa Lower Cambuntan, barangay Bolinawan, siyudad sa Carcar niadtong Lunes sa alas 2:40 sa hapon.

Ang mga biktima mao ang drayber sa motorsiklo nga Sunriser nga gimaneho ni Oliver Landungon, 29, minyo, molupyo sa barangay Ocaña, Carcar ug nagmaneho nga walay lisensiya.

Samtang ang angkas niining inahan nga maoy namatay mao si Magdalena, 52. Samtang ang drayber sa nakaligis nga trak de karga nga Puso (GPH-334) mao si Rene Pecante, 34, molupyo sa Maaslom, Manoyod, Negros Oriental.

Matud ni SPO3 Reynaldo Fuentes sa Carcar Police Station sa dihang nahinabi sa Banat News, ang motorsiklo gikan sa merkado ug paingong mopauli sa barangay Ocaña. Samtang ang trak de karga gikan sa Dumaguete ug paingon sa lungsod sa Minglanilla.

Si SPO3 Fuentes, miingon nga ang inahan nga si Magdalena napasok ug nalatayan sa atras nga ligid samtang ang drayber nabagnos sa sementadong karsada.

Daling gihatod sa Carcar District Hospital ang mga biktima apan gideklarar nga dead on arrival ang inahan samtang gibalhin sa Vicente Sotto Memorial Medical Center (VSMMC) sa dakbayan sa Sugbo ang anak nga nabalian sa walang tiil.

Samtang ang drayber sa trak boluntaryong mitahan sa kapolisan ug nagtingkagol karon sa karsel samtang nagpaabot sa tukmang sumbong nga ipasaka batok kaniya. – BANAT NEWS