CEBU, Philippines - Misaka og sobra 500 ang kaso sa dengue dinhi sa Central Visayas ilabi na dinhi sa Sugbo sulod lang sa usa ka semana.
Sa labing ulahing rekord sa Regional Epidemiology Surveillance Unit (RESU-7) ubos sa buhatan ni Renan Cimafranca nga gikan niadtong Enero 1 ning tuiga hangtod Septiyembre 12, miabot ang kaso sa dengue og 6,146 ug 43 na ang namatay sa tibuok Central Visayas.
Kini gihulagway nga mas taas og 32.2 porsiyento itandi sa milabay’ng tuig nga duna lay 4,648 ka mga kaso ug 63 ang patay.
Sa milabay’ng semana, base sa rekord sa RESU-7, miabot og 5,571 ang mga kaso sa dengue ug 32 ang namatay ug sulod lang sa usa ka semana misaka ang kaso sa dengue ngadto sa 6,146 nga mitaas og 575 ug sa 32 nga patay misaka ngadto sa 43.
Samtang ang siyudad sa Sugbo mao gihapoy nagpabiling nag-una sa labing daghan og kaso sa dengue nga miabot og 1,412 ug siyam ang patay, nagsunod ang siyudad sa Tagbilaran nga dunay 422 ug tulo ang patay.
Nahimutang sa ikatulo mao ang siyudad sa Lapulapu ug dunay 255 ka kaso ug duha ang patay, Toledo nga dunay 205, Talisay dunay 196 ug duha ang patay, Dumaguete sa Negros Oriental, 188 ug usa ang patay, Danao 154, Mandaue, 113 ug tulo ang patay, Naga, 113, ug Sibulan, Negros Oriental, 94.
Nunot niini, si Department of Health (DOH-7) regional director Dra. Susana Madarieta mibalikbalik og awhag sa publiko ug sa mga lokal nga kagamhanan pagpalig-on sa kampanya ilabi na sa paglimpyo sa palibot ug ipangyabo ang magpundo nga tubig nga itlogan sa lamok nga magdala og dengue virus. – BANAT NEWS