Rama nasayop sa pamahayag - Buscato

CEBU, Philippines - Ang mga opisyal sa buhatan sa panglawas sa probinsiya sa Sugbo mitumbok nga sayop ang unang pamahayag ni Mayor Mike Rama sa dakbayan sa Sugbo nga 35 porsiyento kuno sa mga pasyente sa dengue sa Cebu City Medical Center ( CCMC) dili taga syudad kundili taga probinsiya.

Sumala pa ni Dr. Chatherine Marie Buscato, sa Integrated Provincial Health Office, nga gisusi nila niadtong nakalabay nga semana ang CCMC.

Kini aron pagsuta gikan sa buhatan ni Director Dr. Merna Go sa CCMC kun pila gyud ang mga pasyente nga taga probinsiya.

Matud pa ni Buscato nga ang ila unta nga tuyo nga matabangan ang maong mga pasyente ug maulian sa nagastong medikasyon ang CCMC.

Apan matud pa ni Buscato nga wala niadtong higayona si Dr. Go busa didto na lamang sila mokuha og kasayuran sa buhatan ni Dr. James Maratas ang nagdumala sa pediatric ward sa CCMC.

Didto nila hisayri nga base sa record sa CCMC gikan sa bulan sa Enero hangtud sa Agosto walay pasyente nga taga probinsiya nga na-admit sa CCMC karong tuiga.

Matud pa ni Buscato nga ang mga medical personnel wala usab makadawat og impormasyon gikan sa City Health Office nga may mga pasyenteng taga probinsiya nga giatiman sa mga trabahante sa CCMC . Hinuon giklaro niini nga sa miaging tuig may usa lamang ka pasyente sa dengue nga taga probinsiya ang nagpatambal sa CCMC. – BANAT NEWS