Judicial revolt gikahadlokan sab sa taga-hudikatura

CEBU, Philippines - Si Regional Trial Court (RTC-7) Executive Judge Meinrado Paredes kusganong misupak sa hulga sa mga kawani ug mga opisyal sa hudikatura nga posibleng mahitabo ang “judicial revolt” kun ipadayon ni Pres. Benigno Simeon Aquino III ang paglaslas sa gamay kaayong budget niini sa sunod nga tuig.

Matud pa ni Paredes nga naluoy siya pag-ayo ngadto sa labing ubos nga mga kawani sa korte sanglit mao man kini ang labing maapektohan kun gamay na kaayo ang budget sa hudikatura hinungdan nga magsalig na lamang sila sa utang.

Si Paredes misempatiya sa mga hurado sa taas nga hukmanan, mga kaubanang mga huwes ug sa mga kawani sa korte kalabot sa paglaslas sa pundo niini.

Apan iyang gitataw nga lisod kaayong mahitabo ang usa ka revolt gikan sa hudikatura sanglit walay bisan usa ka mahistrado sa Korte Suprema nga makapangulo sa gibahad nga judicial revolt batok sa administrasyong Aquino.

Si Paredes nahadlok nga ang mga tawo motulisok kanila nga utro nga mga kurakot sa   higayon nga mosalmot sa judicial revolt.

Giangkon ni Paredes nga ang hudikatura karon nasudlan og politika sanglit ubay-ubay sa mga huwes ang nakaangkon sa ilang tagsatagsa ka mga posisyon tungod sa rekomendasyon sa mga politiko hinungdan nga may mga desisyon nga ma-impluwensiyahan sa nagrekomendar.

“Seguro maayong atong himuon is to cleanse its ranks of undesirable members. Labing importante is to help restore the people’s faith in our justice system. Way padrino system, no corruption and the judge will work hard,” sumala pa ni Paredes kinsa giila nga tinamod nga propesor ug lecturer sa mga law school sa Sugbo.

Matud pa sa maong huwes nga sa higayon nga makita sa katawhan ang labing maayong performance sa korte pinaagi sa walay pagpinig ug dali nga hustisya, ang publiko na ang mohimo og revolt pabor sa hudikatura sa nasud kun laslasan ang gahin alang niini.

Dugang pa ni Paredes nga ila nang napanglantawan nga mosamot kakulang ang office supply sa korte kun laslasan pa ang budget sa judiciary sa sunod nga tuig kay pipila sa mga huwes ug mga kawani sa korte nangunay na gani sa pagpalit sa suplay sa buhatan dili pa minus ang budget sa judiciary labaw pa nga us-usan pa kini sa sunod tuig. (BANATNEWS)