Miuwang maoy napusilan ug

CEBU, Philippines - Talandugon ang kahimtang sa usa ka ulitawo human kini maigo sa bala dihang miuwang sa away sa iyang higala ug sa kontra niini didto sa Sitio Puntod Alaska, Barangay Mambaling syudad sa Sugbo sa miaging gabii.

Ang biktima giila nga si Arnold Caballero Empleo, 42, ulitawo, nga taga Highway Fatima, Barangay Duljo Fatima, ning dakbayan.

Samtang ang suspetsado nailhan usab nga si   Ogcel Cabo, hingkod, nga silingan ra usab sa biktima.

Matud pa sa imbestigasyon sa kapolisan sa Cebu City Police Office (CCPO) nga dili ang biktima maoy puntariya sa suspetsado ug naangin lang kini.

Kini samtang nag-inom si Empleo kauban sa iyang higala nga ginganlan lang og “Jun-jun”, kalit lang miabot si Cabo nga nagdala og guna ug dayong bahad kang Jun-jun nga iyang patyon.

Apan midugang ang kapolisan nga miuli dayon ang suspetsado dihang nakamatikod kining armado si Jun-jun. Pipila ka gutlo mibalik ang suspetsado nga nagdala na og armas de fuego, dayong pabuto makaduha.

Samtang milihay si Jun-jun, ang bala didto motaroy sa walang bahin sa ulo ni Empleo.

“Ni uwang man gud siya sa mga nag away nga kahibalo man unta na siya nga adunay dalang armas si Ogcel” asoy sa igsuon sa biktima nga si Analiza Empleo.

Daling gihatod ang biktima ngadto sa Cebu City Medical Center samtang gipangita pa sa kapolisan ang suspetsado kinsa nakasibat dayon human sa hitabo.  (BANATNEWS)