CentCom mitubag sa pasangil sa Bayan Muna

CEBU, Philippines - Gitubag sa Central Command ang alegasyon ug pagduda sa mga militanteng pundok ilabi na ang Bayan Muna ug Karapatan sa pag-ingon nga mibalik na usab sa karaan nilang taktika ang maong mga progresibong grupo pagdaot sa pangalan sa Armed Forces of the Philippines,

Sumala pa sa 3rd Civil Relations Group, Civil Relations Service nga nagbase sa Central Command nga ang pasangil sa maong grupo kanila (AFP) kabahin sa ‘pagsignit’ kang Elke Ray Bacalso nga sakop sa Kabataan Partylist niadtong Septiyembre 8 usa lang ka pamaagi aron sila dauton.

Si Bacalso giingong gisignit ug gibuhian diha sa lungsod sa Alcoy, apan walay eksplinasyong nigawas sa media kabahin sa nahitabo. Ang mga lider sa nagkadaiyang progresibong grupo mipasangil nga may koneksyon sa gi-extend nga Oplan Bantay Laya sa AFP ang maong hitabo aron harason ang mga militante.

“Bayan Muna, Karapatan and other progressive organizations are again in the attack mode and on their old tactics of besmirching the AFP and government immediately blaming the military as the perpetrators of the reported alleged abduction maybe of their own doings,” matud pa sa pamahayag.

Si Lt. Col. Jerry Lim, Group Commander, 3CRG, CRSAFP nagkanayon nga ang gihimo sa Karapatan maoy mihimo niini ug gigamit kini aron ipasangil ngadto kanila aron makakuha og atensyon dinhi sa Sugbu sanglit karon nimenus na ang suporta sa mga walhon gikan sa komunidad.

Ang Cebu Provincial Police Office padayon pa sa pag-imbestigar sa maong kaso, samtang gibutyag ni Lim nga dili lang kini maoy unang susamang hitabo nga diin usa sa mga sakop sa militanteng pundok ang gideklarar nga missing apan nahibaw-an nga mipauli ra kini sa iyang mga ginikanan. (BANATNEWS)