Liboan misalmot sa Alay Lakad sa Lapu

CEBU, Philippines - Liboan ka mga kawani, tinun-an ug mga trabahante sa pribadong mga kompaniya misalmot sa Alay Lakad 2010 sa dakbayan sa Lapulapu kagahapon sa buntag.

Ang kalihukan nagdala sa tema nga “Kagalingan ng Kabataan Responsibilidad ng Bayan.” Gisugdan ang kalihukan sa alas 6 sa buntag.

Si Mayor Paz Radaza sa dakbayan sa Lapulapu nga mitambong sa kalihukan mipadayag nga base sa tema sa “Alay Lakad 2010” ang kaugmaon sa kabataan karon nagkinahanglan sa pag-abag sa lokal nga kagamhanan.

Matud pa ni Radaza nga sa dakbayan sa Lapulapu usa sa prayoridad niya ang kabataan. Gumikan niini, natukod ang Homecare sa barangay Gun-ob alang sa kabataan ug sa mga batang libud-suroy sa dakbayan sa Lapulapu.

Si Philippine State College of Aeronautics campus director Dr. Nonadel Soriano, mga magtutudlo ug 400 ka mga tinun-an lakip sa misalmot sa maong kalihukan. Si Soriano mipadayag sa ilang suporta ngadto sa mga kabataan.

Matud ni Soriano nga dako og katungdanan ang mga tinun-an sa nasud sa umaabot nga mga adlaw ug ang maggiya kanila ngadto sa kalampusan mao ang panagtambayayong sa mga magtutudlo ug sa lokal nga kagamhanan.

Samtang ang mga sakop sa pribadong sektor nga misalmot sa maong kalihukan lakip sa gipasalamatan ni Radaza sa ilang gipakitang suporta ngadto sa kalihukan sa Alay Lakad.

Matud pa ni Radaza dako og tabang ang mga kahugpungan sa pribadong sektor gumikan sa ilang suporta sa Alay Lakad Foundation nga nagsuporta sa mga scholars sa nagkadaiyang tunghaan. (BANATNEWS)