CEBU, Philippines - Ang pagpadagan og Land Rail Transit (LRT) sa Sugbo maoy gipaningkamutan ni Kongresista Eduardo Gullas sa unang distrito sa lalawigan sa Sugbo nga mapatuman bisan pa sa mga babag.
Sa gipahigayong joint meeting sa mga sakop sa mga kontraktor sa tibuok nasud sa milabay’ng gabii sa Cebu Country Club sa Banilad, ning dakbayan sa Sugbo, si Gullas mipasalig ngadto sa maong grupo sa pag-implementar sa iyang mga proyekto alang sa probinsiya sa Sugbo.
Si Gullas mibutyag ngadto sa mga sakop sa Philippine Contructors Association, Inc. (PCA) ug Cebu Contractors Association Inc. (CCA) nga aduna siya’y upat ka mga “big-ticket item” nga gipaabot nga maimplementar ,ug nanghinaot siya nga ikapatuman kini pinaagi sa “private-public” sector partnership o pagkumboya sa sector nga pribado ug sa gobyerno.
Ang nahisgutang big-ticket item mao ang P740-million nga proyekto sa LRT pinaagi sa usa ka tunnel niini nga magsumpay sa Cebu ug Lapu-Lapu City, uban sa implementasyon sa Cebu Economic Zone (CEDZ) ug water dam project.
Niadtong 15th Congress gi-usab sa pagduso ni Gullas ang iyang LRT Bill nga mao ang “House Bill 92” ug matud pa niya iyang gilauman nga mapasar na kini sa dili pa mahuman ang iyang termino.
Ang nahisgutang transport system magdugtong sa dakbayan sa Mandaue, Cebu ug Naga ug paingon ngadto sa habagatang bahin sa Sugbo gikan sa lungsod sa Minglanilla, Naga, San Fernando, Carcar, Sibonga, Argao ug Dalaguete.
Midugang usab si Gullas nga ang gisugyot nga tunnel daan nang plano sukad pa niadtong tuig 1984 dihang ang Japanese economist migama sa Cebu Masterplan.
Gituohan sa kongresista nga ang tunnel nga magsumpay sa Lapu-Lapu ug habagatang bahin sa probinsiya sa Sugbo magsulbad sa problema sa kahuot sa trapiko sa lalawigan.
Hinuon wala pa siya moduso og bill kabahin sa tunnel, matud pa ni Gullas.
Sa laing bahin, ang water dam project gikatakdang kasugdan na kung ang Akta Republika 9486 kon “Central Cebu Protective Landscape (CCPL) maimplementar na.
Si Gullas kinsa maoy nangamahan sa CCPL Law nagkanayon nga ang maong balaodnon maghatag og katugotan sa pagtukod sa mga dam diha sa mga watershed area aron may abundang suplay sa tubig sa tibuok probinsiya.
Ang maong balaodnon usab nag-ila sa watershed reserve sa Buhisan, Mananga sa dakbayan sa Talisay, Sudlon National Park, Central Cebu National Park ug Kotkot-Lusaran isip nahilakip sa Cebu Central Protective Landscape. (BANATNEWS)