Lalaki gipatay sa taga Lawis

CEBU, Philippines - Usa ka wala mailhing lalaki ang gigukod ug gipatay sa grupo sa mga residente diha sa sitio Lawis sa barangay Alaska-Mambaling kagahapon sa kaadlawon. Ang namatay sulod sa tambalanan gibana-banang nagpangidaron og 25-anyos, adunay mga patik nga “Boss Yawa” sa tuong bahin sa iyang tiyan, balay sa kaka diha sa tuong abaga ug pangalang “Ababon” diha sa tuong paa.

Sumala pa ni SPO3 Rey Cuyos sa Homicide Section sa pakighinabi sa Banat News ang biktima nakaangkon og samad pinusilan sa walang abaga, ilok, tuong bahin sa dughan nga milapos sa ilok gikan sa wala pa matinong kalibre sa armas.

Gidala ang maong lalaki sa mirespondeng grupo nila ni SPO1 Rene Sebes sa Mambaling Police Station ngadto Cebu City Medical Center.

Si PO3 Wetzel Berry sa mitug-an sa Banat News nga nakabsan sa iyang kinabuhi ang biktima kinse minutos sa wala pay alas-6 sa buntag kagahapon ug wala pa gihapoy tagtungod nga mi-claim sa patay’ng lawas niini. Wala pa nila matumbok kun si kinsa ang mga tawong migukod sa biktima apan sumala pa ni Berry posibleng gidudahang nakasala kini sa maong dapit maong gitabangan og gukod ug gipusil.

“Ang estorya sa mga tawo didto gigukod daw ni sa mga tawo unya nakadungog sila og duha ka buto dayon nahagba. Walay siguro kun nanghilabot na siya (biktima) didto o kadudahan ba ang iyang lihok unya guilty siguro maong gigukod,” matud pang Berry. Apan naproblema sila karon gumikan kay bisan usa sa mga residente wala makatumbok kun si kinsa maoy mipusil sa biktima. (BANATNEWS)