Civilian volunteer gipatay sa CIDG

CEBU, Philippines - Namatay ang kanhi miyembro sa Civilian Volunteer Organization (CVO) human kini pusila sa usa ka miyembro sa Criminal Investigation and Detection Group (CIDG) didto sa barangay Cantuod, lungsod sa Balamban sa miaging hapon.

Ang biktima nailhan nga si Agapito Cuizon, hingkod, nga taga Cantuod, samtang ang suspetsado mao usab si PO3 Artemio Batuto Tumakay Jr., hingkod ug kasamtangang nadestino sa Cebu-Criminal Investigation and Detection Team sa dakbayan sa Bogo.

 Ang biktima nasabak sa usa ka bala sa tiyan nga milapos sa iyang likod   nga maoy hinungdan sa hinanali niyang kamatayon.

Sa pakighinabi sa Banat News kang SPO3 Arbie Banate Jr. sa Balamban Police Station, iyang gibutyag nga ang biktima uban sa iyang asawa nga si Epifania ug ang usa ka tuig niining anak sakay sa ilang motorsiklo.

Samtang ang suspetsado nagsakay usab sa iyang motorsiklo uban ang iyang higala nga si Dennis Paradero.

Sa dihang nagkasugat ang motorsiklo sa biktima ug si suspetsado nakurat ang naulahi dihang mimandar kaniya si Paradero nga pabalikon sa ilang giagian.

Kini tungod kay buot diay siyang makigkomprontasi sa biktima kinsa daan niyang kabangi ug kadumot.

Busa ang suspetsado kinsa walay kalibotan sa pagdinumtanay ni Paradero ug sa biktima, mikalit og patuyok sa iyang motorsiklo nga niadtong higayona mipatuyok usab ang biktima sa iyang motorsiklo hangtod nga nagdungan sila og hunong taliwala sa karsada.

Midugang si Banate nga sa ilang paghunong giingong kalit lang mipabuto sa iyang .45 kalibre nga pistola ang biktima, apan abtik nga nakalihay si Paradero ug ang suspetsado.

Busa sa kabalaka nga mamatay sila nga dili makapanalipod sa kaugalingon mipabuto usab ang suspetsado sa iyang armas de fuego mibalos ang suspetsado og pabuto hangtod nga nagkasinukliay sila og mga bala.

Ang mga pinisik sa saag nga bala naka-igo sa laing tawo nga miagi sa karsada sa maong higayon nga nailhang si Manulito Amber Artajo kinsa nasabak sa iyang tuong kamot.

Samtang ang biktima maayong pagka-igo sa iyang tiyan nga misangpot sa hinanaling kamatayon niini.

Midugang si Banate nga gibutyag sa suspetsado nga wala siya’y tuyo sa pagpatay sa biktima ug ang iyang gihimo isip otoridad sa balaod mao lamang ang pagpanalipod sa iyang kinabuhi ug ni Paradero.

Kini tungod kay wala siya’y kasayoran nga nagdinumtanay diay si Paradero ug ang biktima gumikan sa personal nga away niini.

Gibutyag pa usab ni Banate nga mireklamo ang asawa sa biktima kay matud pa dihang natumba na ang iyang bana, may buot untang motabang niini apan gipugngan kuno sa suspetsado, busa nabugtoan gyud sa kinabuhi diha sa karsada ang biktima.

 Sa iyang bahin, si Banate nagkanayon nga posibleng tinuod ang migawas nga estorya nga gipugngan kuno sa polis nga ikahatod dayun sa tambalanan ang biktima kay gani bisan sila, dugay kaayong nasayod sa maong hitabo, matud pa ni Banate.

Miingon si Banate nga ang kauban pa nila nga polis nga nadestino sa traffic nga si SPO2 Jude Dennis Agwanta maoy unang mirespondi sa maong hitabo human kini tawga sa asawa sa biktima.

Kini tungod kay ang crime scene ug ang ilang police station gibana-bana lang nga adunay gilay-on nga tres kilometros.

Apan matud pa ni Banate nga ila usab nga suta-on kun aduna ba kini kamatuoran ang pamahayag sa asawa sa biktima.

Si Banate miingon nga uban sa iyang kaubanan mopahigayon sila og lawom nga imbestigasyon kun unsa gyud ang tinuoray nga hinungdan sa maong pinusilay.

Samtang nakuha sa crime scene mao ang pito ka kabhang sa bala sa kalibre .45 ug ang armas niini uban sa magazine nga wala nay sulod nga bala.

Ang suspetsado boluntaryo usab nga mitahan sa iyang kaugalingon sa dihang ang kapolisan mi-alarma sa maong hitabo ug uban niyang gitahan ang iyang service firearm nga kalibre .9mm nga adunay magazine nga gisudlan og unom ka buhing bala, PNP ID ug MR.

Ang patay’ng lawas sa biktima ipa-ubos sa autopsiya samtang anaa kini hayaa sa ilang panimalay.

Kasamtangan karong nagtingkagol sa karsel ang suspetsado samtang nagpaabot kini nga pasakaan og kasong murder o homicide sa kapolisan. (BANATNEWS)