CEBU, Philippines - Usa ka lalaki nga nagdala og nubain nasikop sa kapolisan sa usa ka checkpoint didto sa A. Soriano St., Barangay Carreta, ning dakbayan sa Sugbo sa miaging gabii.
Ang suspetsado giila nga si Marvin Ylaya Amparado, 18, ulitawo ug molupyo sa B. Rodriguez, Barangay, Sambag 2, ning syudad.
Sumala sa kapolisan nga gumikan sa katahapang dagway sa suspetsado ila kining girikisa dihang miagi kini sa ilang checkpoint.
Sa ilang paghiling sa bulsa niini didto nakita nila ang usa ka syringe nga gisudlan og Nalbuphine, Hydrocloride nga gituohang Nubain.
Kasamtangang gieksamin ang maong ebidensya sa Regional Crime Laboratory (RCL) 7 alang sa chemical analysis niini.
Ang suspetsado kasamtangang gitanggong sa kapolisan ug nagpaabot sa tukmang kaso nga isang-at batok kaniya. (BANAT NEWS)