Babayeng suspek sa kawat gisikop sa iyang biktima

CEBU, Philippines - Usa ka babaye nga suspetsado sa pagpangawat nadakpan sa iyang gikawatan didto sa Sitio Camparang, barangay El Pardo, lungsod sa Boljoon sa miaging hapon.

Ang suspetsado giila nga si Jocelyn Macawili y Delima, 24, dalaga, taga barangay Colon, dakbayan sa Naga apan kasamtangan nga nagpuyo sa Sitio Camparang.

Samtang ang iyang biktima mao ang magtiayong Ramil ug Arsula Fajardo, pulos hingkod ug nagpuyo usab sa maong dapit.

Si Macawili maoy gituohang mikuha sa P10 mil nga gipanag-iya sa magti-ayong Fajardo.

Matud pa sa mga biktima nga ang maong salapi ilang gibutang sulod sa usa ka cabinet sa ilang balay apan kalit lang kining nahanaw. Atol sa follow up operation sa kapolisan, gisikop ni Ramil Fajardo ang suspect atubangan sa kapolisan sa Boljoon Police Station.

Ang suspek gikuyogan nila didto sa balay niini ug didto nakit-an nila ang usa ka plastic nga pitaka nga adunay sulod nga P2,580 nga gituohang bahin sa P10 mil nga gikawat, usa ka relo nga panglalaki ug bracelet nga pangbata.

Anaa na karon sa kustodiya sa Boljoon Police Station ang suspek samtang nagpaabot kini sa tukmang kaso nga ipasaka ngadto sa korte batok kaniya. (BANAT NEWS)