Team sa DOJ gikan sa Hong Kong abot na

CEBU, Philippines - Miabot na gikan sa Hong Kong ang team sa Department of Justice (DOJ) ug National Bureau of Investigation (NBI) nga gitahasang mokuha sa mga pamahayag sa mga survivor sa bus hostage-taking niadtong Agosto 23.

Apan si DOJ Senior State Prosecutor Cielito Celi nagkanayon nga taas pa kaayo ang latasong proseso sa imbestigasyon ug ilaha pang dad-on ngadto sa Incident Investigation and Review Committee (IIRC) ang nakuhang mga pamahayag.

Hinuon mapasalamaton si Celi sa gihimong kooperasyon sa kagamhanan sa Hong Kong atol sa ilang lima ka adlaw’ng pagpakigkita sa mga survivors. Mibutyag si Celi nga pipila sa mga survivor ang nagdumili pakig-atubang kanila tungod sa pagka-traumatized sa nahitabo, samtang aduna pay laing survivor nga mihangyong mopasalipod lang kini sa kurtina samtang gikuhaan og pamahayag.

Hinuon gipasabot ni Celi ang mga biktima bisan ang mga Filipino wala mahimuot sa nahitabo ug dili gustong mahitabo kini kanila.

Wala hinuoy gibutyag si Celi sa mga pamahayag sa mga survivors ilabi na may kalambigitan sa forensic evidence. “Ang masasabi ko lang ay 'yung activities. Pero as to the substance, 'yung laman, ay for analysis, for evaluation lahat 'yan,” matud pa niini sa report sa ABS-CBN News. (BANAT NEWS)