CEBU, Philippines - Duha ka patay’ng lawas ang napalgan sa managlahing lugar ug oras sa lalawigan sa Sugbo samtang usa niini hangtod karun wala pa hiilhi sa kapolisan.
Pasado alas-6 sa buntag kagahapon sa hapon usa ka kanhi trabahante sa National Power Corporation ang napalgang patay daplin sa baybayon sa barangay Olivo lungsod sa Tabuelan.
Ang namatay nailhan nga si Manuel Planco, 66, molupyo ra usab sa maong lugar.
Sa pakighinabi sa Banat News ni PO2 Yuri Colonia, alas-5 sa kaadlawon dihang nakadawat sila og tawag gikan sa usa ka concerned citizen ug mipahibalong adunay patay’ng tawo sa maong dapit. Tuod man sila SPO1 Raymund Jugan ug PO2 Gilbert Allego daling miresponde sa maong dapit apan wala sila’y nakit-ang timailhan kun nalumos ba kini o gituyo sa pagpatay.
Ang pamilya ni Planco miawhag sa kapolisan nga ipa-awtopsiya ang patay’ng lawas niini aron pagpapas sa mga pagduda.
Sa laing bahin, ang usa ka wala mailhing lalaki ang napalgang wala nay panimuot sa lungsod sa Poro, sa isla sa Camotes niadtong Miyerkules apan nakabsan sa iyang kinabuhi human sa tulo ka adlaw nga pagkalandig sa Ricardo Maningo Memorial Hospital.
Ang maong lalaki hangtod ning pagsulat sa balita wala pa gihapon mailhi ug gihulagway lang nga nagpangidaron og 50-anyos, itomon, gibana-bana ang gitas-on nga 5’4 ug adunay tattoo nga buwak sa mga rosa sa tuong abaga. (BANAT NEWS)