Army milarot sa 8 mil ka marijuana

CEBU, Philippines - Kapin sa P2 milyones nga kantidad sa marijuana gipanglarot sa mga sakop sa 78th Infantry Batallion sa Philippine Army, kapolisan sa lungsod sa Balamban ug Philippine Drug Enforcement Agency (PDEA-7) sa sitio Liki, barangay Magsaysay, lungsod sa Balamban.

Ang mga naibot gibanabanang adunay gidaghanon nga 7,435 ka mga stalks ug gibanabana kini nga nagkantidad og P2,230,500 kun ibase sa street value sa maong klase sa narkotiko.

Matud pa sa commanding officer sa 78th IB nga si Lt. Col. Nolasco Mempin nga dako ang iyang pasalamat sa mga concerned citizens nga mihatag og impormasyon tungod kay ila gyud nga mababagan ang mga ilegal nga drugas sa maong lungsod.

Midugang si Lt. Col. Mempin nga magsilbe untang warning sa mga marijuana planters ang ilang gihimo nga walay puas nga pagpangibot isip tipik sa ilang kampanya kontra drugas.

Samtang ang maong marijuana gisunog ra usab dayon sa mga sundalo, kapolisan ug PDEA-7 sa maong lugar tungod kay daw maglisod sila og agi sa maong lugar tungod sa kahagip-ot ug kalisod sa agianan sa sakyanang kargahan sa mga marijuana. - BANAT NEWS