Kap apil sa angol sa bangga

CEBU, Philippines - Tulo ang naangol apil na ang kapitan sa barangay ug usa ka magtutudlo human magkadinasmagay ang duha ka motorsiklo sa sitio Lantawan, barangay Tominjao, lungsod sa Tuburan niadtong Miyerkules sa alas 5 sa hapon. Ang mga naangol mao ang drayber sa habal-habal nga Yamaha 125 (7492-GI) nga si Randy Lumacang, 25, ulitawo, molupyo sa barangay Calangajan. Si Lumacang walay lisensya ug walay registration sa motor. Laing naangol nga angkas niini nga si Ruth Tamayo, 25, minyo ug magtutudlo sa elementarya sa barangay Calangajan.

Samtang ang gikakontra sa dinasmagay mao ang Skygo nga motorsiklo nga dunay kolor pula nga walay plate number ug gimaneho ni Kapitan Nicomedes Gracia sa barangay Amatogan. Si Garcia giingong walay lisensiya.

Matud pa ni PO3 Antonio Albite sa Tuburan Police Station sa dihang nahinabi sa Banat News nga ang habal-habal ni Lumacang gikan sa Calangajan paingon sa Poblacion. Samtang ang kapitan gikan sa Poblacion ug paingon nang mopauli sa barangay Amatogan. Subay sa inisyal nga imbestigasyon nga pag-abot sa maong lugar aksidenting nagkadinasmagay ang duha ka motorsiklo sa dihang nagkasugat kini. Nalamba ang duha ka motor hinungdan sa pagkalabay sa drayber ug angkas niini nga pulos wala magsul-ob og helmet hinungdan sa naangkong mga pangos ug bun-og sa lawas.

Daling gihatod sa Tuburan District Hospital ang mga biktima apan ang drayber sa habal-habal nga si Lumacang gibalhin sa tambalanan dinhi sa dakbayan sa Sugbo tungod sa delikadong kahimtang. Samtang luwas na sa peligro ang kapitan ingon man ang magtutudlo nga pasahero.   – BANAT NEWS