Miambak o nahagbong?

CEBU, Philippines - Usa ka gidudahang gumon sa ginadiling drugas ang napalgang patay ilawom sa 15 ka metros nga bung-aw sa barangay Budlaan ning dakbayan kagahapon.

Gisusi na karon sa kapolisan ang hinungdan sa kamatayon ni Jeremy Bontilao, 19, kun kini mituyo ba gyud sa pag-ambak o aksidente rang nahulog sa maong bung-aw samtang kini nakit-ang nagdagan. Sumala pa sa usa ka Mark Denver Simoga, 17, nga ig-agaw ni Bontilao ngadto sa mga imbestigador nga miadto sa ilang balay ang namatay alas-3 sa kaadlawon ug misugilon: “Naay gagukod nako.”

Diha-diha giingong kalit nga milayat gikan sa bintana si Bontilao ug mikaratel og dagan padulong sa pinuy-anan niini.

Tungod sa gipanulti sa ig-agaw daling migawas si Simoga aron pagsusi kinsay migukod niini apan wala siyay nakit-ang tawo diha sa gawas. Dangtan ang upat ka oras, ang inahan ni Bontilao nga si Angelina naghangos nga miabot sa balay nila ni Simoga ug nagpakitabang sa ilang banay aron pangitaon ang anak nga si Bontilao. Sa tanto nilang pinangita nasigpatan ni Simoga si Bontilao diha sa ubos sa bung-aw sa daplin sa dalan hinungdan nga mitawag sila sa Talamban police station pagpangayo og tabang.

Sa gihimong imbestigasyon sa kapolisan, nagbuy-od na ang biktima diha sa ubos ug nagsugod na og gahi ang lawas niini, aduna say dakong gisi sa agtang niini ug nagkadugo ang lawas.

Si SPO1 Jay Yballe sa Homicide Section mibutyag base sa pamahayag sa igsuon ni Bontilao nga si Analyn, tiggamitan og ginadiling drugas ang igsuon niini.

Si Yballe nagdudang posibleng ‘high’ kini sa ginadiling drugas niadtong tungura.  – BANAT NEWS