Don Sergio O. gihandum sa Sugbu

CEBU, Philippines - Gisaulog kagahapon sa buntag pinaagi sa usa ka Santos misa diha sa Don Sergio marker sa dalan Osmeña Boulevard ang paghandum sa ika-132 nga adlaw’ng natawhan sa kanhi presidente Sergio Osmeña Sr. nga gibansagang “The Grand Old Man of Cebu.”

Usa ka Santos nga Misa pinangulohan ni Msgr. Roberto “Boy” Alesna ang gihalad nga gitambungan sa mga kabanay ni Osmeña ug suod nga pamilya.

Si Alesna mihulagway sa kanhi presidente nga usa ka matinud-anong tawo ug tinuoray nga nag-alagad sa iyang mga konstituwente.

Gawas sa mga opsiyales sa siyudad nga gipangulohan ni Mayor Michael Rama, mitambong usab sa maong kalihukan ug mipahigayon og floral offering ang apo ni Osmeña nga si Serge Osmeña Valencia.

Si Valencia misaysay sa mga maayong nabuhat sa iyang apohan ug wala kini political ambition kondili aron magkahiusa ang mga Filipino “People referred to him as a statesman rather than a politician for his greatest concern was to serve the Filipino people before his own political ambition,” nagkanayon si Valencia.

Ang paghandom sa mga Sugbuanon sa adlaw’ng natawhan ni Osmeña nagsugod niadtong Mayo 22, 1990 human giaprobahan ang Akta Republika 6953 nga nagdeklarar sa Septiyembre 9 nga usa ka special non-working holiday sa lalawigan ug dakbayan sa Sugbo.

Si Osmeña nagsugod sa iyang karera sa politika niadtong 1904 ug maoy nahimong labing bata nga gobernador sa Sugbo sa pangidaron nga 25.

Sa tuig 1935, nahimo siyang senador hangtud napili siya pagka-bise presidente ug sa tuig 1944 siya maoy mihulip kang presidente Manuel Quezon isip presidente.  – BANAT NEWS