Nagpa-rehistro alang sa Sk, Brgy elections mikibra

CEBU, Philippines - Migamay ang mga nagparehistrong botante alang sa 2010 synchronized barangay ug Sangguniang Kabataan election karong Oktubre 25 base sa talaan sa Provincial Comelec diin masakop ang urbanized cities , lakip na ang Cebu City and Lapu-Lapu City.

Matud pa ni Provincial Comelec supervisor Lionel Marco Castillano, ang registered voters alang sa Oktubre 25 nga eleksyon miabot ngadto sa 2, 364, 257 kumpara sa 2, 430, 049 registered voters niadtong May 10 election. 

Duna kini deperensiya nga 65,792 o 2.78 porsiyento nga pag-us–os sa mga botante.

Samtang kung hisgutan ang mga botante sa SK, ang Comelec dunay natala nga 122, 710 voters niadtong 2007 samtang miabot lang karon og 101, 157 kon 46.20 porsiyento ang pag-ubos alang sa karong Oktubre nga eleksyon.

Pipila sa hinungdan sa minos nga mga botante mao ang pakyas sa pagbotar sa usa ka tawo sa sunod-sunod nga duha ka mga eleksyon.

Samtang dili palang dugay, ang buhatan sa Commission on Elections miduso sa Resolution No. 9002 nga nagmando nga i-cluster ang mga presinto sa umaabot nga eleksyon karong Oktubre gumikan kay dunay uban nga tunghaan nga minos kaayo ang gidaghanon sa mga lawak. – BANAT NEWS