Hugaw'ng barko pamultahon
CEBU, Philippines - Tungod sa daghang reklamo sa mga pasahero nga hugaw kaayo ang masakyan nilang mga barko nga nagbiyahian dinhi sa Kabisay-an, ang Bureau of Quarantine (BOQ) ug Maritime Industry Authority (Marina) mopahigayon og kinalit nga inspeksyon ilabi na kun sila makadawat og reklamo gikan mismo sa mga pasahero.
Kagahapon gipirmahan ang memorandum of agreement (MOA) alang sa katukoran sa Joint Sanitation Inspection Team (JIST) tali nila ni Sr. Quarantine Medical Officer Emmanuel Labella, Nanneth Villamor-Dinopol, regional director sa Marina-7 ug ang tag-iya sa Trans-Asia nga si Arthur Kenneth Sy.
Si Labella nagkanayon nga daghan kaayo silang nadawat nga reklamo gikan sa mga pasahero nga nakasakay sa mga inter-island vessels nga hugaw kaayo ilabi na kun hisgotan ang pansayan sa barko.
Gawas niini laing reklamo nga nadawat sa BOQ mao ang kakuwang sa mga kahimanan sa barko ug walay klarong serbisyo sa mga tripulante.
Si Dinopol sa iyang bahin miingon nga gikinahanglan nila ang hugot nga suporta sa mga nanag-iya og barko alang sa inspeksiyon.
Adunay giumol nga team ang BOQ ug Marina nga naglangkob sa kapin 10 ka personahe sa duha ka buhatan nga mosakay aron mo-inspeksiyon sa mga barko.
Matud ni Dinopol nga adunay multa ang mga tag-iya og barko nga hugaw. Hangtod P100,000 ang multa sa dagkong barko, samtang P50 mil sa mga gagmay.
Si Labella miingon nga pabayron og multa ang tag-iya sa barko apan ipaagi kini sa due process.
Dili na kinahanglan ang pormal nga complaint sanglit plano nilang duna silay hotline number alang sa mga pasahero. – BA NAT NEWS
- Latest
- Trending
