'Mi-ambush' sa Apo manager sikop balik

CEBU, Philippines - Suspetsado sa pagpamanhig sa usa ka manager sa Apo Cement Corp. gisikop og balik sa kapolisan sa dakbayan sa Lapulapu sa milabay’ng hapon sa barangay Mactan.

Pinaagi sa bench warrant nga giisyu ni Regional Trial Court Judge Gabriel Ingles, si Orlando Sagnoy gisikop pagbalik gumikan kay wala kini motunga sa duha ka hugna sa pagdungog sa kasong giatubang niini sa korte.

Human madawat sa kapolisan sa dakbayan sa Lapulapu ang maong warrant, daling gihimo ni Chief Insp. Sereno Tabay Jr. ang pagsikop ni Sagnoy sa barangay Mactan pinaagi sa pagdala og decoy pagsusi kun anaa ba kini sa lugar.

Matud pa ni Sagnoy wala siya makadawat og subpoena gikan sa korte sa gikatakdang adlaw sa pagdungog sa iyang kaso hinungdan nga wala kini makatunga sa husay niini.

Kagahapon sa buntag pormal nga gidala sa sala ni Judge Ingles si Sagnoy ug posibleng dili na kini katugotan nga makagawas ug makapiyansa.

Kahinumduman nga si Sagnoy maoy suspetsado sa pagbanhig ni Nestor Zamoras, manager sa Apo Cement Corp. niadtong bulan sa Hulyo ning tuiga didto sa Ayala Center sa dakbayan sa Sugbo.

Walay naangol atol sa maong insidente gumikan kay bullet proof ang sakyanan ni Zamoras ug sa dihang misukol ang biktima dali nga misibat ang duha ka lalaking namusil.

Nasikop si Sagnoy human kini naglakaw na lang sa dihang gibiyaan kini sa iyang kauban atol sa pagpamanhig gumikan sa karatol ug sa dihang nasikop gitug-an usab ni Sagnoy ang iyang kauban nga si Roberto Tersero ug ang mastermind niini nga si Gerome Noel. – BA NAT NEWS