Korean patay sa fun diving

CEBU, Philippines - Patay na nga napalgan ang usa ka Koreano nga nag-fun dive sa barangay Maribago, dakbayan sa Lapulapu sa milabay’ng adlaw.

Ang nakit-ang patay na nga naglutaw mao si Yonggon Jeong, 27, Korean national gikan sa Seoul, South Korea.

Sa imbestigasyon ni SPO2 Ernesto Francisco ug PO3 Dioscoro Arong sa Homicide Section sa Lapulapu City Police Office, nasuta nga niadtong Septiyembre 6, si Jeong uban sa iyang kauban nga si Kyung Woo   nagpahigayon og fun diving sa kadagatan sa Maribago.

Matud pa ni Woo 10 sila ka mga Korean nationals nga miapil sa fun dive diin unang dive nila mga alas 10 sa buntag, ikaduhang dive ala una sa hapon ug katapusan mga alas 3 sa hapon.

Sa dihang ilang giihap ang ilang mga kauban kulang na sila og usa hinungdan nga gibati nila ang kabalaka nga si Jeong wala mopatim-aw sa ibabaw sa dagat.

Gipaabot sa mga kaubanan si Jeong, apan giingong nagpabilin kini ilawom sa dagat hangtod miabot ang kagabhion.

Gumikan niini, ang mga sakop sa Philippine Coast Guard ug pipila ka mananagat mihimo og search and rescue operation ug gumikan sa kangitngit sa ilawom sa dagat temporaryo nilang gihunong ang pagpangita sa Koreano.

Kagahapon sa alas 6 sa buntag, mibalik ang mga sakop sa Coast Guard, PNP Lapulapu Divers ug Aviation Divers sa maong dapit. Mga alas 7:30 kagahapon sa buntag napalgan si Jeong sa ika-19 metros nga giladmon sa Dakitdakit Point nga wala nay kinabuhi.

Sa pagsusi sa kapolisan, nasuta nga ang gauge sa oxygen tank mitumong na sa zero ug wala nay hangin hinungdan sa pagkalumos niini.

Si Jeong miabot dinhi sa Sugbo niadtong Septiyembre 3 ug kasamtangan nagpuyo sa Golden Peak Hotel sa dakbayan sa Sugbo.

Matud pa ni SPO2 Francisco nga ilang ipaubos sa autopsy ang patay’ng lawas ni Jeong alang sa pagkonpirmar sa hinungdan sa kamatayon niini. – BA NAT NEWS