Motor vs. motor duha ang patay

CEBU, Philippines - Duha ang patay ug duha usab ang angol human magdinasmagay ang duha ka motorsiklo didto sa F. Paras St., barangay Poblacion lungsod sa Barili sa miaging gabii.

Ang namatay nailhan nga sila si Louie delos Reyes, hingkod, nga taga barangay Balao, Barili ug Farel Joseph Transmonte , hingkod, nga silingan ni delos Reyes.

Samtang ang anaa sa talandugong kahimtang mao sila si Fedelito Vergara, hingkod nga taga sitio Gemilina, barangay Poblacion, ug Fredirich Mendoza, hingkod nga taga Poblacion gihapon.

Si PO3 Heinie Aspera sa Barili Police Station mibutyag sa Banat News nga ang motorsiklo nga gimaneho ni Vergara   gikan sa lungsod paingon sa merkado samtang ang gimaneho ni delos Reyes gikan sa merkado nga gikasugat ni Vergara.

Apan tungod sa kakusog sa pinadaganay sa usa’g-usa samtang nagsubay sa F. Paras street, nagkadasmag ang duha ka motorsiklo hinungdan nga ang matag drayber   uban sa ilang mga pasahero nangalagpot ug pagtugpa nila sa karsada tungod kay walay mga helmet wala na magkadimao ang ilang kahimtang.

Gihatod silang tanan sa Vicente Sotto Memorial Medical Center sa dakbayan sa Sugbo diin didto ideklarar ang duha nga sila si delos Reyes ug Transmonte nga pulos nawad-an na sa ilang kinabuhi.

Padayon pang giimbistigar karon sa kapolisan ang maong hitabo. - Darrel A. Carumba ug Reggie M. Pajaron (BANAT NEWS)