CEBU, Philippines - Samdan ang bukton sa usa ka tawo human kini tigbasa og pinuti sa iyang silingan sa barangay Bangbang, lungsod sa Cordova sa miaging hapon.
Ang biktima mao si Jose Andales, 56, minyo, nga taga Bangbang, samtang ang suspetsado mao usab si Antonio Cantaveja, 52, biyudo nga silingan sa biktima.
Si PO2 Calixto Botantan sa kapolisan sa Cordova mibutyag sa Banat News nga dugay nang nagkabangi ang biktima ug ang suspetsado ug nagdinumtanay.
Nataymingan usab niadtong higayona nga milakaw ang biktima apan samtang diha kini sa karsada nasugatan ang suspetsado nga nagtakin og pinuti.
Gumikan kay daan nang nagdumot, pagkasugat sa duha gihapsan dayon sa suspetsado ang liog sa biktima, apan gumikan sa kaabtik ug nakalihay ang naulahi, miawas ang maong tigbas.
Gisundan dayon og laing tigbas kay gusto sa suspetsado nga patyon ang iyang silingang kontra, apan nasagang kini sa biktima hinungdan nga ang iyang bukton maoy hapit maputol.
Unya nakadagan ang biktima ug nakapangayo og panabang sa ilang mga silingan nga maoy mitawag sa kapolisan.
Gihatod dayon ang biktima ngadto sa Vicente Sotto Memorial Medical Center sa dakbayan sa Sugbo samtang ang suspetsado mitahan usab sa kapolisan sa Cordova ug nagtingkagol siya karon sa prisohan. – BANAT NEWS