CEBU, Philippines - Mireklamo ang mga kawani ni Bise Gobernador Gregorio Sanchez kay gipakalitan sila og audit sa mga piniyalan ni Gobernador Gwen Garcia sa miaging Lunes.
Ang mga kawani ni Sanchez mitumbok nga ang mga opisyal sa Provincial Human Resources Office (PHRO), opisina nga ubos sa buhatan sa gobernador nangita kanila sa ilang tagsatagsa ka lingkoranan ug gisil-ing kun nagtrabaho ba sila.
Si Sanchez sa iyang bahin nagkanayon nga dili kinahanglanon nga i-audit ang iyang mga sakop kay siya mao may katungod niini ug nahibawo siya kun asa nagtrabaho ang iyang mga sakop.
Si Sanchez gustong mangayo og pagpasabot ni Noli Valencia, hepe sa PHRO sa iyang kalit nga pag-audit sa iyang mga sakop .
Sa iyang bahin, si Capitol Consultant on Information Rory Jon Sepulveda miangkon nga siya maoy nagpatawag og random audit sa mga kawani sa buhatan sa bise gobernador.
Usa sa hinungdan niini matud ni Sepulveda mao ang pagpatrabaho ni Sanchez sa pipila niya ka mga kawani ngadto sa iyang pribadong umahan sa lungsod sa Tuburan. – BANAT NEWS