Sanchez wa manginsulto sa media

CEBU, Philippines - Gipanghimakak ni Bise Gobernador Gregorio Sanchez ang pasangil nga iyang giinsulto ang mga sakop sa media nga nag-beat sa Kapitolyo gumikan kay matud pa nakaminus siya gumikan sa pagpunay niini og pangaon sa dili pa manginterview sa gobernador.

Si Sanchez sa interview sa DyRF miingon nga wala siya makaminus sa mga beat reporter sa Kapitolyo, kinsa   papaniudtohon pirme ni Gobernador Gwen Garcia sa iyang buhatan, kay dili man usab siya makapakaon niini sa higayong moadto sa iyang buhatan human sa press conference sa buhatan sa gobernador.

Apan gitataw ni Sanchez nga dili lamang unta kada adlaw sanglit makuwestiyon ang objectivity sa mga reporter.

Iyang gitataw nga may pipila ka mga sakop sa media nga naenpluensyahan ang report tungod sa gipanghatag sa buhatan sa gobernador.

Gani iyang nahibaw-an nga pipila niini ang pakuyogon pa sa gobernador sa iyang pagsuroy-suroy sa kalungsoran ug ingon man sa biyahi niya ngadto sa gawas sa nasud.

Subling gitumbok sa bise gobernador nga ang Kapitolyo karon puwerting dakoa og utang sa Marco Polo Hotel, Cafe Laguna ug uban pa nga gikontrata sa mga kalihukan sa Kapitolyo.

Usa sa nakapadako ning utanga mao ang gipakaon sa gobernador ngadto sa taga media. – BANAT NEWS