CEBU, Philippines - Usa diay ka retiradong polis ang gidudahang gunrunner nga nasikop sa Tabuelan wharf.
Si SPO2 Rodulfo Montejo, 53, lumad nga taga barangay Aspera, lungsod sa Sara, Ilo-Ilo city miretiro niadtong tuig 2003.
Nasikop si SPO2 Montejo sa kapolisan sa Tabuelan ug nakuhaan og daghang mga paltik nga armas gikan sa dakbayan sa Danao.
Matud pa ni SPO2 Montejo nga nangompra siya sa mga armas tungod kay iyang nabantayan nga daghan og mga tawo sa ilang dapit nga magkinahanglan og armas tungod sa kadaghan sa mga dautang elemento.
Midugang si SPO2 Montejo nga dili pa lang siya dugay nga misulod sa maong negosyo ug gani mao pa lang kini ang unang higayon nga siya mitaak sa Sugbo tungod kay kaniadto ang mga tighimo og armas ang mohatod ngadto sa ilang dapit ug igo lang kini nila nga tagboon.
Tungod sa kadugay sa higayon nga wala na sila makapalit og armas iya kining gipersonal og anhi sa Sugbo. Mibutyag kini nga kun wala pa lang siya masikop makalusot gyud unta kadto.
Sumala pa usab ni SPO2 Montejo misulod siya sa maong negosyo kay dili paigo iyang pension pagpatungha sa iyang duha ka anak.
Si SPO2 Montejo miingon nga ang napalit niyang kalibre .38 mikantidad lang og P1,300; shotgun, P7 mil; kalibre .45, P6 mil; kalibre .357, P1,500 ug Ingram P9 mil lamang.
Kasagaran sa mga kustomer niya mga mag-uuma sa Ilo-Ilo.
Si Sr. Supt. Erson Digal, direktor sa Cebu Police Provincial Office mapasalamaton sa concerned citizen nga mihatag og impormasyon ngadto sa kapolisan aron masikop si Montejo. (BANATNEWS)