Assault Unit sa Lapu giporma

CEBU, Philippines - Nagkahiusa ang upat ka “Assault Unit” sa Philippine Center for Aviation Security o PCAS 7 Special Operation Unit, Lapulapu City Police SWAT Team, 710th Special Operations Wing sa Philippine Air Force ug ang Airport Police Department SWAT Team sa pagbansaybansay didto sa Most Important Person (MIP) sa MCIA kagahapon sa buntag.

 Matud pa ni P/SSupt. Joselito Salido, hepe sa PCAS 7 nga maoy ilang tumong ang paghiusa sa ilang mga lakang sa panahon nga may krisis nga mahitabo sulod sa tugpahanan sa MCIA.

 Nagkalain-lain ang paagi sa pagsulbad sa krisis apan gikinahanglang magkahiusa ang ilang lihok ilabi na kung mangayo og tabang ang PCAS-SOU sa ubang unit.

 Kagahapon duha ka senaryo ang gipakita sa mga assault unit nga mao ang pagpang-hostage sulod sa usa ka edipisyo ug ang hostage taking sulod sa bus.

 Miingon si SSupt. Salido dako pa og kuwang ang tanan kay wala pa kaayo magkahiusa ang lihok sa tanang hingtungdan apan sa sunod nga higayon nilang pagbansay kinahanglang kaantigo na ang tanan sa gitawag nga team work. (BANATNEWS)