Gipusil sa iyang kainom namatay

CEBU, Philippines - Patay diha-diha ang 34 anyos nga lalaki human pusila sa iyang kainom didto sa Sitio Bagacay, barangay Tayud, sa lungsod sa Consolacion sa miaging gabii.

Ang biktima mao si Silverio Retiza Jr., 34, minyo, nga taga Tayud, samtang ang suspek mao si Wilfredo Magali, 50 anyos, minyo ug silingan sa biktima.

Si SPO4 Joseph Yungco sa Consolacion Police mibutyag sa Banat News nga ang biktima ug ang suspek nag-inom sa ilang tugkaran dihang nagkalalis sila.

Miinit ang ilang panaglalis ug ang suspetsado kinsa nahutdan na sa katarungan milanit sa iyang armas de fuego ug gidul-it kini pagpusil sa ulo sa biktima.

Napisok ang sentro sa luyong bahin sa ulo sa biktima ug dangtan og pipila ka gutlo nahagba kini dayong banaw sa daghang dugo sa iyang ulo nga maoy iyang namatyan.

Ang suspek misuway sa pag-eskapo apan gibabagan sa mga silingan hinungdan nga nasikop siya ug nasakmit usab sa kapolisan ang iyang kalibre .38 nga armas nga dunay upat ka basiyong bala sa cylinder niini ug gibalhog dayon siya sa prisohan. (BANATNEWS)