CEBU, Philippines - Dul-ang 200 ka pamilya ang makabenepisyo sa labing unang socialized housing program ubos sa administrasyon ni Mayor Michael Rama dinhi sa dakbayan sa Sugbo niining mosunod nga mga adlaw.
Kini human makigtagbo kaniya didto sa iyang buhatan sa City Hall ang mga opisyal sa Upper Sta. Ana Homeowners Association (USAHA) nga gipangulohan sa ilang presidente nga si Tessie Racho ug consultant Antonio Pabatang aron paaprobahan sa mayor ang pagpagawas sa P21 milyones nga budget alang sa yuta nga palitonon para sa maong kapunungan.
Si konsehal Joey Daluz ang chairman sa Committee on Budget sa konseho maoy nangabogar sa mga miyembro sa USAHA ug mipasabot sa mayor sa tanan bahin sa maong grupo nga pulos taga Labangon ning dakbayan sa Sugbo.
Gipahibawo ni Daluz nga na-aprobahan na ang maong gahin kaniadto ni kanhi Mayor ug Kongresista na karon sa habagatang distrito sa dakbayan sa Sugbo Tomas Osmeña.
Gisulti ni Daluz nga naabtan lang sa eleksyon niadtong Mayo 10, hinungdan nga wala ma-release ang maong kantidad nga maoy ibayad ngadto sa yuta nga himoong puloy-anan sa 185 ka pamilya sa USAHA .
Lakip sa mitabang paglakbit-saysay kang Rama sa maong proyekto mao si Kapitan Felix Abella sa barangay Labangon ug ang iyang anak nga si konsehal Norvic Abella usa ka geodetic engineer nga maoy nag-survey sa mikapin 8 mil metro kwadrado nga luna nga gipanag-iya sa Villa Salud property sa Upper Sta. Ana, Labangon.
Ang mga benepisyaryo niini matud ni Racho mao kadtong nabiktima sa dakung sunog sa barangay Tisa ug Labangon pipila na ka tuig ang milabay ug ang namuyo sa daplin sa sapa sa Labangon nga girekomendar nga i-relocate tungod sa ka-piligro sa ilang kinabuhi sa panahon nga adunay baha.
Gipasabot ni Racho nga ang 185 ka pamilya nga maoy benepisyaryo sa maong socialized housing program sa kagamhanan nagsugod na og hikay sa maong proyekto sukad pa niadtong tuig 2007. (BANATNEWS)